सञ्चालनमा आयो कागेश्वरी मनोहरा नगरपालिकाको नवनिर्मित भवन

Last updated at 05:22 pm

काठमाडौं जिल्लाको कागेश्वरी मनोहरा नगरपालिकाको नवनिर्मित भवनको उद्घाटन गरिएको छ । सोमबार धार्मिक विधिअनुसार हवन तथा रुद्री पूजा गरेर नगरपालिकाको भवन उद्घाटन गरी सञ्चालनमा ल्याइएको हो ।

नयाँ भवन सञ्चालनमा आएसँगै नगरपालिकाले आफ्नो सेवालाई सहज र सरल बनाउँदै प्रभावकारी गर्ने जनाएको छ । नवनिर्मित भवनबाट प्रशासनिक कामकाजलाई सरल र पारदर्शी बनाउने नगर प्रमुख उपेन्द्र कार्कीले बताए ।

वातावरण संरक्षणमा जोड दिंदै सेवा प्रवाहमा थप सुधार ल्याउने योजना रहेको उनको भनाइ छ । मेयर कार्कीले आफ्नो कार्यकालमा विभिन्न सकारात्मक कामहरू गर्दै नगरपालिकालाई समृद्धिको मार्गमा अगाडि बढाउने बताए ।

नयाँ भवन उद्घाटनको रुद्री पूजामा नौ वटै वडाका वडाअध्यक्ष, स्थानीय जनप्रतिनिधि, समाजसेवी, कर्मचारी तथा नगरवासीहरूको उपस्थिति थियो ।

भवनमा कार्यालय कक्षहरू, सभाकक्ष, सेवाग्राही प्रतीक्षालय र प्राविधिक पूर्वाधारहरू जडान गरिएका छन् । साथै, नवनिर्मित भवन अपाङ्गमैत्री छ भने डिजिटल प्रणालीको पनि प्रयोग गरिएको छ ।