व्यवसायिक वातावरण सुधार्न कानूनमा गरिएका संशोधन स्वागतयोग्य : उद्योग परिसंघ
Last updated at 05:58 pm
नेपाल उद्योग परिसंघले मुलुकमा आर्थिक तथा व्यावसायिक वातावरण सुधार्न, लगानी अभिवृद्धि एवं सार्वजनिक सेवा प्रवाहमा सुशासन प्रवाह गर्न सरकारले हालै कानूनमा गरेको संशोधन स्वागतयोग्य भएको बताएको छ ।
सरकारले आर्थिक तथा व्यावसायिक वातावरण सुधार र लगानी अभिवृद्धि सम्बन्धी केही नेपाल ऐन संशोधन गर्न बनेको अध्यादेश मार्फत ११, सुशासन प्रवर्द्धन तथा सार्वजनिक सेवा प्रवाह सम्बन्धी केही नेपाल ऐन संशोधन गर्न बनेको अध्यादेश मार्फत १२ सहित कुल २४ कानूनमा गरिएको संशोधनले मुलुकमा लगानी अभिवृद्धि गर्न सहयोग पुग्ने परिसंघले बतएको छ ।
परिसंघले समग्र अर्थतन्त्रको विकासका लागि कानुनमा गरिनुपर्ने सुधार सम्बन्धी विस्तृत अध्ययनसहित सुझाव सरकारलाई बुझाएको थियो ।
समृद्ध अर्थतन्त्र निर्माणका लागि कानूनमा सुधार अपरिहार्य रहेको अवस्थामा सरकारले केही कानुनमा गरेको सुधारका लागि परिसंघले नेपाल सरकारलाई धन्यवाद दिँदै कानून प्रभावकारी कार्यान्वयनका लागि अनुरोध समेत गरेको छ ।
हाल बजारको समग्र मागमा आएको उच्च संकुचन तथा व्यवसायीको खस्किँदो मनोबल लगायत कारण लगानी बढ्न नसकिरहेको अवस्थामा कानूनमा गरिएको सुधारले लगानीकर्तामा सकारात्मक सन्देश जाने परिसंघको विश्वास छ ।
गत वैशाखमा सम्पन्न लगानी सम्मेलनको पूर्वसन्ध्यामा केही कानूनमा संशोधन गरिए पनि समयमै आवश्यक नियमावली तथा कार्यविधि नबनाइँदा सुधार गरिएका कानूनबाट अपेक्षाकृत उपलब्धि हासिल हुन नसकेकोतर्फ गम्भीर हुँदै हाल सुधार गरिएका कानूनको प्रभावकारी कार्यान्वयनका लागि समयमै आवश्यक नियमावली तथा कार्यविधि ल्याउन समेत परिसंघले सम्बन्धित सरोकारवालाको ध्यानाकर्षण गराएको छ ।
परिसंघले सुधारका लागि माग गर्दै आएको अर्थसँग सम्बन्धित, भूमिसँग सम्बन्धित तथा सार्वजनिक खरिदलगायत कानूनमा समेत यथाशीघ्र सुधार गर्न आग्रह गरेको छ ।
