प्रभु हेलिकप्टर १०औं वर्षमा, आईपीओ निष्कासन गर्ने तयारी

Last updated at 02:49 pm

प्रभु हेलिकप्टर स्थापनाको १०औं वर्षमा प्रवेश गरेको छ ।सोही अवसरमा प्रभु हेली लिमिटेडका अध्यक्ष सुभाष अमात्यले पछिल्लो एक दशकमा प्राप्त साथ र सहयोगप्रति सम्पूर्णमा आभार व्यक्त गर्दै आगामी दिनमा थप गुणस्तरीय सेवा दिने बताएका छन् ।

एक दशकअघि तत्कालीन मुक्तिनाथ हेलिकप्टरका नामबाट सञ्चालित कम्पनीलाई प्रभु ग्रूपले २०७२ सालमा सम्पूर्ण शेयर खरिद गरी प्रभु हेलिकप्टरका नामबाट सञ्चालनमा ल्याएको हो । एक थान ‘रोबिन्सन’ हेलिकप्टरबाट व्यावसायिक यात्रा सुरु गरेको प्रभुसँग अहिले दुई थान ‘एयरबस एच१२५’ हेलिकप्टर छन् ।

कम्पनीले हाल पोखरा, काठमाडौं र लाङटाङमा हेलिकप्टर टुर तथा साइटसिइङ सेवा उपलब्ध गराइरहेको छ । मुक्तिनाथ, गोसाइँकुण्ड, कालीञ्चोक भगवती र लुम्बिनीमा पनि हेलिकप्टर टुर उपलब्ध गराउँदै आएको छ ।

कम्पनीले सगरमाथा, अन्नपूर्ण र माछापुच्छ्रे हिमालको आधार शिविरमा पनि हवाई उडान गर्नुका साथै उद्धार लगायत सेवा पनि उपलब्ध गराउँदै आएको छ ।
शुरुमा कम्पनी ऐन २०६३ अन्तर्गत एक निजी लिमिटेड कम्पनीका रूपमा समावेश गरिएको प्रभु हेलिकोप्टर प्रालि असार ३०, २०७९ देखि पब्लिक लिमिटेड कम्पनीमा रूपान्तरण भएको थियो । कम्पनीसँग पोखरामा आफ्नै ह्यांगर सुविधा पनि छ ।
कम्पनीले सर्वसाधारणका लागि आईपीओ निष्कासन तयारी गरेको बताएको छ । कम्पनीका अनुसार आईपीओ निष्कसन गर्न बिक्री प्रबन्धकमा मुक्तिनाथ क्यापिटललाई नियुक्त गरिसकिएको छ ।