सञ्चालनमा आयो सामान ढुवानी सहज बनाउन ‘टिम भरिया’ एप

Last updated at 05:11 pm

ढुवानी क्षेत्रलाई डिजिटल माध्यमबाट सहज बनाउन ‘टिम भरिया’ एप सार्वजनिक गरिएको छ ।

टिम भरिया कम्पनीका प्रमुख कार्यकारी अधिकृत(सीईओ) कमल फुयाँलका अनुसार एपमा राइड सेयरिङ एपहरू पठाओ र इन्ड्राइभ जस्तै विशेषताहरु छन् ।

उनले ढुवानी साधनहरूले भोग्दै आएको समस्यालाई समाधान गर्ने उद्देश्यले एप विकसित गरिएको जानकारी दिए । उनले ट्रक वा अन्य गाडीहरूले सामान ढुवानीका लागि ट्रान्सपोर्ट कम्पनीहरूमा गएर कुरिरहनुपर्ने अवस्थाको अन्त्य गर्ने योजना रहेको बताए ।

अब ‘टिम भरिया’ एपमार्फत कम्पनी वा सप्लायर्सले पठाउनुपर्ने सामानको विवरण प्रविष्ट गर्न सक्नेछन्। राइडरहरूले उक्त विवरण हेरेर भाडा स्वीकार गर्न वा आवश्यक परेमा समायोजन गर्न सक्नेछन्।

एपमा तीन प्रकारका साइन अप विकल्पहरू ‘आई एम ड्राइभर’, ‘आई एम कार्गो’, र ‘आई एम ट्रान्सपोटर’ छन् । साथै, एपमा डोमेस्टिक र लङ रुट गरी दुई फरक क्याटेगोरीमा गाडीहरू उपलब्ध छन्।